काठमाडौं – इस्लामावादमा इरान र संयुक्त राज्य अमेरिका बीच जारी युद्धविराम वार्ता अब विशेषज्ञ तहमा पुगेको छ । छलफलमा सुरक्षा, राजनीति, सेना, अर्थतन्त्र र कानुनसँग सम्बन्धित विज्ञहरू सहभागी छन् ।

सञ्चारमाध्यमका अनुसार दुवै देशका शीर्ष नेताहरूबीच प्रत्यक्ष संवाद भइरहेको छ। उक्त बैठकमा पाकिस्तानका प्रतिनिधिहरू पनि उपस्थित छन् । यद्यपि, हालसम्म यस वार्ताको कुनै तस्बिर सार्वजनिक गरिएको छैन ।

अमेरिकाको टोलीको नेतृत्व उपराष्ट्रपति जेडी भान्सले गरिरहेका छन् भने इरानको नेतृत्व संसदका सभामुख मोहम्मद बाघेर घालिबाफले गरिरहेका छन् । सन् १९७९ मा भएको इरानी इस्लामिक क्रान्ति पछि पहिलो पटक यति उच्च तहमा दुवै देशबीच प्रत्यक्ष वार्ता भइरहेको हो ।

यसअघि इरानले इस्लामावादमा भइरहेको वार्ता निष्कर्षमा नपुगेको खण्डमा त्यसको जिम्मेवारी केवल इजराय माथि मात्र नपर्ने चेतावनी दिएको थियो । इरानका अनुसार इजरायल र अमेरिकाका निर्णयहरू आपसमा सम्बन्धित रहेकाले वार्ता असफल भए अमेरिकालाई पनि जिम्मेवार मानिनेछ।