काठमाडौं- पाकिस्तानको राजधानी इस्लामावादमा इरानसँगको उच्चस्तरीय शान्ति वार्ताका क्रममा पाकिस्तानी प्रधानमन्त्री शहबाज शरिफ र अमेरिकी उपराष्ट्रपति जेडी भान्सबीच महत्वपूर्ण भेटवार्ता भएको छ । यस भेटमा अमेरिकी उपराष्ट्रपतिका साथमा अमेरिकी प्रतिनिधिमण्डलका सदस्यहरु स्टिभ विटकफ र जारेड कुश्नर पनि सहभागी थिए ।

उक्त अवसरमा पाकिस्तानका तर्फबाट उपप्रधानमन्त्री तथा विदेशमन्त्री इशाक डार र गृहमन्त्री मोहसिन नक्वीको पनि उपस्थिति रहेको थियो । प्रधानमन्त्री कार्यालयका अनुसार भेटवार्तामा प्रधानमन्त्री शरिफले यो वार्ताले क्षेत्रीय स्तरमा दिगो शान्ति स्थापनाका लागि एउटा बलियो आधारस्तम्भको काम गर्ने विश्वास व्यक्त गरेका छन् ।

उनले दुवै पक्षबीच समन्वय र सहजीकरण गर्न पाकिस्तान सदैव प्रतिबद्ध रहेको कुरा पुनः दोहोर्‍याएका छन् । भेटवार्ताका लागि इस्लामावाद पुगेका अमेरिकी प्रतिनिधिमण्डलसँगको यो संवाद हुनुअघि सोही दिन प्रधानमन्त्री शरिफले इरानी प्रतिनिधिमण्डलसँग पनि औपचारिक वार्ता गरेका थिए ।

इरानी टोलीको नेतृत्व इरानी संसदका सभामुख मोहम्मद बघेर कलिबाफ र विदेशमन्त्री सइद अब्बास अराघचीले गरेका थिए । प्रधानमन्त्री शरिफले दुवै देशका प्रतिनिधिहरूसँग अलग-अलग संवाद गरी शान्ति प्रक्रियालाई अघि बढाउने पहल गरिरहेका छन् ।

यद्यपि, अमेरिकी र इरानी पक्षसँग प्रधानमन्त्री शरिफबीच भएका छुट्टाछुट्टै छलफलका विस्तृत विवरणहरू भने हालसम्म सार्वजनिक गरिएको छैन । पाकिस्तानले मध्यस्थकर्ताका रूपमा दुवै पक्षलाई एकै टेबुलमा ल्याउने प्रयास गरिरहँदा इस्लामावादमा भइरहेको यो कूटनीतिक सक्रियताले विश्वभरको ध्यान खिचेको छ ।