काठमाडौं- विदेशी बैंकहरूमा रोक्का गरिएका इरानको अर्बौँ मूल्य बराबरका सम्पत्ति फुकुवा गर्न अमेरिका सहमत भएको छ । इरानी स्रोतलाई उद्धृत गर्दै समाचार संस्था रोयटर्सले विदेशी बैंकमा रहेका इरानका सम्पत्ति फुकुवा गर्न अमेरिका सहमत भएको जनाएको हो ।

नाम नबताउने सर्तमा रोयटर्ससँग कुरा गर्दै उक्त इरानी स्रोतले सम्पत्ति फुकुवा गरिनुलाई होर्मुज जलडमरूमा सुरक्षित आवतजावत सुनिश्चित गर्ने प्रयाससँग प्रत्यक्ष रूपमा जोडिएको जनाएको छ ।

यस कदमलाई पाकिस्तानको राजधानी इस्लामावादमा इरानसँग चलिरहेको शान्ति वार्ताप्रति अमेरिका गम्भीर रहेको अर्थमा बुझिएको छ । इरानले यसअघि नै विदेशमा रोक्का राखिएका आफ्ना सम्पत्ति फुकुवा नभएसम्म वार्तामा नबस्ने चेतावनी दिएको थियो ।

यद्यपि, अमेरिकी पक्षले भने इरानको सम्पत्ति फुकुवा गर्ने विषयमा अहिलेसम्म कुनै सार्वजनिक प्रतिक्रिया दिएको छैन ।