काठमाडौं- पाकिस्तानको राजधानी इस्लामावादमा अहिले सुरक्षा व्यवस्था कडा पारिएको छ । शहरमा सुरक्षाका लागि प्रहरी, सेना र कमाण्डो गरी करिब १० हजार सुरक्षाकर्मी परिचालन गरिएको छ । इरान र अमेरिकाबीच शान्ति वार्ता सुरु हुनै लाग्दा शहरमा सुरक्षा व्यवस्था चुस्त पारिएको छ ।

राजधानीको मुख्य प्रशासनिक क्षेत्र ‘रेड जोन’ जाने सबै बाटोहरू सिल गरिएका छन् भने विभिन्न देशका प्रतिनिधिहरू इस्लामावाद आउने क्रम सुरु भइसकेको छ । तर पाकिस्तानी अधिकारीहरूले कुन देशका प्रतिनिधि आएका हुन् र उनीहरूसँग के विषयमा कुरा हुँदैछ भन्नेबारे केही खुलाएका छैनन् ।

यो वार्ता निकै महत्वपूर्ण मानिएको छ । लामो समयको प्रयास र केही दिनको तीव्र तयारीपछि पाकिस्तानले यो मध्यस्थता गर्ने वातावरण बनाएको हो । पूर्वनिर्धारित तालिका अनुसार यो वार्ता आजै हुनुपर्ने थियो ।

तर व्यवस्थापकीय कठिनाइका कारण अब वार्ता भोलि मात्र हुने जनाइएको छ । यस प्रक्रियाबाट सकारात्मक नतिजा आउनेमा पाकिस्तानी मन्त्री र अधिकारीहरू आशावादी देखिएका छन् ।