कोलकाता– इन्डियन प्रिमियर लिग (आईपीएल) २०२६ को १५औँ खेलमा लखनऊ सुपर जायन्ट्सले कोलकाता नाइट राइडर्समाथि ३ विकेटको रोमाञ्चक जित हात पारेको छ । इडेन गार्डेनमा बिहीबार राति भएको अन्तिम बलसम्मको प्रतिष्पर्धामा मुकुल चौधरीले विष्फोटक ब्याटिङ गरेपछि कोलकाता घरेलु मैदानमै स्तब्ध बनेको हो ।

कोलकाताले दिएको १८२ रनको लक्ष्य लखनउले ७ विकेट गुमाएर अन्तिम बलमा पूरा गर्‍यो । लखनउको जितका नायक बनेका मुकुल चौधरीले मात्र २७ बलमा २ चौका र ७ छक्काको मद्दतले अविजित ५४ रन बनाए । उनले अन्तिम ओभरमा आवश्यक १४ रन बनाउँदै टोलीलाई महत्वपूर्ण दुई अंक दिलाए । लखनउका लागि आयुष बदोनीले ५४ र एडेन मार्करमले २२ रनको योगदान दिएका थिए ।

बलिङतर्फ कोलकाताका वैभव अरोरा र अनुकुल रोयले २–२ विकेट लिए पनि अन्तिम ओभरमा रन रोक्न नसक्दा हार बेहोर्नुपर्‍यो ।

यसअघि टस हारेर पहिले ब्याटिङ गरेको कोलकाताले निर्धारित २० ओभरमा ४ विकेट गुमाएर १८१ रन बनाएको थियो । उसका लागि युवा ब्याटर अंगकृष रघुवंशीले सर्वाधिक ४५ रन बनाए भने कप्तान अजिंक्य रहाणेले ४१ रनको योगदान दिए । त्यस्तै, रोभम्यान पावेलले ३९ र क्यामरुन ग्रीनले ३२ रन जोडे पनि त्यो स्कोर जितका लागि पर्याप्त हुन सकेन ।

लखनउका दिगभेष राठी, मनिमारन सिद्धार्थ र आवेश खानले १–१ विकेट लिए । आक्रामक ५४ रन जोडेका लखनउका मुकुल चौधरी ‘प्लेयर अफ द म्याच’ घोषित भए ।

यो जितसँगै पाँचौं स्थानको लखनउले तीन खेलबाट चार अंक जोडेको छ । कोलकाता भने चार खेल खेल्दा एक अंकसहित नवौं स्थानमा छ ।