काठमाडौं- राष्ट्रिय स्वतन्त्र पार्टीका सभापति रवि लामिछानेको भरपर्दा राष्ट्रिय प्रजातन्त्र पार्टी जिल्लिएको छ।

उपसभामुख पदका लागि राप्रपा संसदीय दलका नेता ज्ञानेन्द्र शाहीले सभापति लामिछानेसँग पटक पटक संवाद गरेका थिए ।

रविसँग भेटेरै पनि संवाद गरेका उनले उपसभामुख पद मिल्नेमा आफू ढुक्क भएको बताएका थिए । बिहीबार पनि उपसभामुखमा समर्थन रहेको बताउँदै रविले फोन गरेपछि मात्रै सांसद सरस्वती लामाले उम्मेदवारी दिएको उनले बताए ।

‘सबैसँग कुरा गरेर नै उम्मेदवारी दर्ता गराएको हो । रविजीले भोलि अरू कुरा जे हुन्छ, हुन्छ, उम्मेदवारी दिनुस् भन्नुभयो’, उनले भने, ‘उहाँहरूले राजनीति गर्नु हुन्छ भने ठिक छ । रास्वपाको सभापतिले फोन गरेकैले उम्मेदवारी दिएको हो।’

उनले आफूहरूलाई धोका भएको संकेत गर्दै बाँकी कुराको जिम्मेवारी रास्वपालाई भएको बताए । ‘स्वयम् पार्टी सभापतिले फोन गरेपछि उम्मेदवारी दिएका हौँ । अब बाँकी कुरा उहाँहरूले गर्नु हुन्छ’, उनले भने, ‘रविजीले किन निर्णय फेर्नु भयो, त्यो उहाँको कुरा हो ।’