पेरिस- इङ्लिस क्लब लिभरपुल च्याम्पियन्स लिग क्वार्टरफाइनलको पहिलो लेगमा पेरिस सेन्ट जर्मेनसँग २–० ले पराजित भएको छ। बुधबार पार्स डेस प्रिन्सेसमा भएको खेलमा लिभरपुलको कमजोर प्रदर्शन फेरि छताछुल्ल भएको छ।

आर्रने स्लोटको टोलीले सिजन जोगाउने आशामा मैदान उत्रिए पनि अपेक्षाअनुसार प्रदर्शन गर्न सकेन।

गत साता म्याचेस्टर सिटीसँग एफए कपमा भोगेको हारपछि उनले खेलाडीहरूलाई कडा प्रतिक्रिया दिन आग्रह गरेका थिए, तर टोलीले त्यसको झल्को देखाउन सकेन।

खेलमा हार टार्नका लागि स्लोटले ३-४-२-१ को रणनीति अपनाउँदै पाँच रक्षकसहितको संरचना प्रयोग गरे। तर खेलको ११औँ मिनेटमै डेजिरे डोयुको डिफ्लेक्टेड प्रहार गोलमा परिणत हुँदा लिभरपुल सुरुआतमै पछि परेको थियो।

पहिलो हाफभर लिभरपुलले एक पनि प्रहार गर्न सकेन। त्यसपछि खाभिचा क्भार्टास्खेलियाले जाओ नेभेसको उत्कृष्ट पासमा गोल गर्दै पीएसजीको अग्रता दोब्बर बनाए। उनले गोलकिपर जीओर्जी मामार्दास्भिलीलाई छलाएर सजिलै गोल गरेका थिए।

दोस्रो हाफमा स्लोटले ७८औँ मिनेटमा चार खेलाडी परिवर्तन गरे पनि खेलको दिशा बदल्न सकेनन्। पीएसजीले थप अवसरहरू सिर्जना गरे पनि गोल गर्न असफल रह्यो।

यस हारसँगै लिभरपुल सेमिफाइनल पुग्ने सम्भावना कमजोर बनेको छ। यद्यपि टोली अझै प्रतिस्पर्धामा रहेको भए पनि युरोपको वर्तमान च्याम्पियनविरुद्ध पुनरागमन गर्न कठिन हुने देखिएको छ।