काठमाडौं – एक्सन जनारामा बन्न लागेको फिल्म ‘एक्का तीन’मा नायक पुष्प खड्का र नायिका पूजा शर्मा जोडीको भूमिकामा रहने पक्का भएको छ ।

निर्माण पक्षले बुधबार फिल्मको शीर्ष नायकमा पुष्प खड्का अनुबन्ध भएको सार्वजनिक गरेको हो । यस फिल्ममा नायिका पूजा शर्मा यसअघि नै फाइनल भइसकेकी छिन् ।

रुपेश तामाङको निर्देशनमा यो फिल्मको छायाङ्कन आगामी जेठबाट हुने बताइएको छ । पुष्प र पूजाको भूमिकाबारे थप केही खुलाइएको छैन ।

यी दुईको यो फिल्ममा दोस्रो सहकार्य हो । उनीहरूको पहिलो सहकार्य रहेको फिल्म ‘३६ को आकडा’ प्रदर्शनमा आइसकेको छैन ।

यस फिल्मका लागि एक–एक नयाँ नायक र नायिकालाई डेब्यू गराउने तयारी भइरहेको पनि निर्माण पक्षले खुलाएको छ ।

जुना फिल्मस् र अधिकार फिल्मस्ले बनाउन लागेको यो फिल्मको कथा सुमन गजमेरले लेखेका हुन् ।

लगातार फिल्म फ्लप भएपछि पुष्प केही समय विश्राम गरी पुनः फर्किएका हुन् । पूजालाई पनि पछिल्लो लामो समयदेखि बक्स अफिसमा सफलता मिलेको छैन ।