काठमाडौं– नेपाल मेडिकल काउन्सिल ले २०८३ सालमा सञ्चालन हुने चिकित्सक दर्ता प्रमाणपत्र (लाइसेन्स) तथा स्नातकोत्तर तहको विशेष परीक्षाको वार्षिक तालिका सार्वजनिक गरेको छ ।

काउन्सिलले चैत २४ गते प्रकाशित सूचनाअनुसार स्नातक तहको लाइसेन्स परीक्षा तीन चरणमा सञ्चालन हुनेछ । पहिलो परीक्षा २०८३ जेठ १२, १३ र १४ गते (मंगलबार, बुधबार र बिहीबार) हुने छ । 

दोस्रो चरण असोज ४, ५ र ६ गते (आइतबार, सोमबार र मंगलबार) तय गरिएको छ भने तेस्रो चरण माघ १३, १४ र १५ गते (बुधबार, बिहीबार र शुक्रबार) सञ्चालन गरिने काउन्सिलले जनाएको छ ।

यस्तै, स्नातकोत्तर तहको विशेष परीक्षा पनि वर्षमा तीन पटक हुने छ । काउन्सिलका अनुसार पहिलो विशेष परीक्षा श्रावण ७ र ८ गते, दोस्रो मंसिर १६ र १७ गते तथा तेस्रो परीक्षा चैत १८ र १९ गते सञ्चालन गरिनेछ ।

काउन्सिलले विदेशबाट चिकित्सा शिक्षा हासिल गरेका विद्यार्थीका लागि पनि विशेष व्यवस्था उल्लेख गरेको छ । सन् २०२० सेप्टेम्बरपछि विदेशमा अध्ययन सुरु गरेका विद्यार्थीले अनिवार्य रूपमा प्रमाणपत्र पेश गर्नुपर्नेछ । 

साथै, अध्ययन अवधि सम्बन्धी आगमन–प्रस्थानको आधिकारिक विवरणसमेत पेश गर्नुपर्ने सूचनामा उल्लेख छ ।

काउन्सिलले सबै परीक्षार्थीलाई तोकिएको मापदण्ड र आवश्यक कागजात पूरा गरी समयमै आवेदन दिन आग्रह गरेको छ ।