काठमाडौं – गायक तथा संगीतकार टंक बुढाथोकीको संरक्षणबाट टाढिएका बाल गायक अशोक दर्जीले एक फिल्मको छायाङ्न सुरु गरेका छन् ।

सडकमा गीत गाउँदा भाइरल भएपछि टंकको संरक्षणमा पुगेका अशोक ८ वर्षपछि टाढिएका हुन् । उनीहरू दुवै आपसी समझदारीमा छुटिएको बताउँदै आएका छन् ।

अशोक तीन महिनाअघि टंकबाट टाढिएर झापामा परिवारसँग बस्दै आएका छन् । टंकले भने केही दिनअघि मात्रै यो कुरा सार्वजनिक गरेका हुन् ।

अशोक अहिले नायिका नीता ढुङ्गानाको डेब्यू निर्देशनमा बन्न लागेको फिल्म ‘पार्वती’को छायाङ्कनमा सहभागी भएका हुन् ।

मंगलबारदेखि कास्कीको मिर्सा गाउँबाट यसको छायाङ्कन सुरु भएको हो । यस फिल्म नीता, दीपाश्री निरौला, सिरु विष्टलगायतका कलाकार मुख्य भूमिकामा रहेको बताइएको छ ।

नीताको कथा रहेको यस फिल्मको स्क्रिप्ट शिवम् अधिकारीले लेखेका हुन् ।

नीता फिल्मस्को ब्यानरमा बन्ने यस फिल्मको निर्माता हरिहर अधिकारी हुन् । भदौ १२ बाट प्रदर्शनमा ल्याउने योजनाका साथ नीता छायाङ्कनमा निस्किएकी हुन् ।