काठमाडौं- प्रतिनिधि सभाको सोमबारको बैठकमा भोजपुरबाट निर्वाचित श्रमसंस्कृति पार्टीका सांसद ध्रुवराज राईले सरकारको कामकारबाही र विकास योजनाबारे टिप्पणी गरेका छन्।

सांसद राईले वर्तमान सरकार शक्तिशाली अवस्थामा रहेकाले साना काममा अल्झिनु भन्दा ठूला योजना अघि बढाउनुपर्ने बताए। ‘यो शक्तिशाली सरकारले गोरेटो होइन, हाइवे नै बनाउनुपर्छ,’ उनले भने।

उनले बजेट निर्माण प्रक्रियामा कुनै पनि जिल्लामाथि विभेद नगर्न आग्रह गर्दै सबै जिल्लालाई समेटेर योजना ल्याउन सरकारलाई सुझाव दिए।

राईले आफूहरू संसद्मा नीति–नियम मात्रै बनाउन नभई विकासको जिम्मेवारी पनि बोकेर आएको उल्लेख गरे। ‘जनताले विकास गर्न सकेनन् भन्ने गुनासो गरिरहेका छन्,’ उनले भने।

सांसद राईले भोजपुर र खोटाङ जोड्ने मध्यपहाडी लोकमार्ग अन्तर्गत करिब १० किलोमिटर सडक १२ वर्षदेखि अलपत्र रहेको भन्दै तत्काल निर्माण सम्पन्न गर्न माग गरे।

त्यसैगरी भोजपुर जोड्ने अरुण र दूधकोशी नदीमाथिका पुलहरू पनि लामो समयदेखि अलपत्र परेको उल्लेख गर्दै उनले ती परियोजनातर्फ सरकारको ध्यानाकर्षण गराए।