काठमाडौं- प्रतिनिधि सभाको सोमबारको बैठकमा युवराज दुलाल ले संसद् र सरकारको भूमिकाबारे कडा टिप्पणी गरेका छन्।

सिन्धुपाल्चोक–२ बाट निर्वाचित नेकपा सांसद दुलालले संसद्लाई कहिलेकाहीँ ‘गफ गर्ने अखडा’ जस्तो बनाइएको टिप्पणी गर्दै संसद्मा कानुन निर्माण हुने भए पनि बहुमतका आधारमा ‘पेल्ने’ प्रवृत्ति देखिएको बताए।

उनले दल त्यागेर जिम्मेवारी लिँदा सत्यको आवाज पनि सुन्नुपर्ने धारणा राख्दै संसद्मा गम्भीर बहस आवश्यक रहेको उल्लेख गरे।

त्यसै क्रममा उनले जनजीवनसँग जोडिएको समस्यातर्फ ध्यानाकर्षण गराउँदै भने, ‘कि सरकारले हामीलाई लगेर पालोस्, कि त बाँदर नियन्त्रण गरोस्।’

सांसद दुलालले सरकारलाई प्रभावकारी काम गर्न आग्रह गर्दै स्टन्टबाजीमा समय खर्च नगर्न चेतावनी दिए।

‘संसद्बाट बहुमतका आधारमा पेल्ने पनि गरिन्छ। दल त्यागेर गरिमामय जिम्मेवारी लिँदै गर्दा सत्यको आवाज पनि सुन्नुस्’, उनले सभामुख डीपी अर्याललाई भने, ‘सरकार एक्सनमा जाओस् तर स्टन्ट गरेर समय बर्बाद नगरोस् ।’

उनले बाँदरको समस्या पनि संसद्मा सुनाए। ‘कृषकहरू सरकारले कि त हामीलाई लगेर पालोस् कि त बाँदरलाई नियन्त्रण गरोस् भनिरहेका छन्’, उनले भने ।