काठमाडौं– अर्थमन्त्री स्वर्णिम वाग्लेले देशलाई ग्रे लिस्टबाट बाहिर ल्याउनको लागि सुशासनको पक्षमा आफूहरूले काम गरेका बताएका छन् । सोमबार स्टक ब्रोकर एशोसिएसनको समूहसँग भेटघाट गर्दै मन्त्री वाग्लेले सो बताएका हुन् ।

‘नेपाललाई ग्रे लिष्टबाट बाहिर ल्याउनु छ, त्यसका लागि सुशासनका काम गर्नु छ, जनमत पनि यही हो, हामी गर्छौँ’, उनले भने, ‘केही अनुसन्धान पुरानै हुन् अहिले अन्तिमतिर पुगेका हुन्, अपराध गरेकालाई उन्मुक्ति हुँदैन तर, छानीछानी प्रतिशोध हुँदैन ।’

सरकार निजी क्षेत्रमैत्री भएको भन्दै उनले रास्वपा र सरकार निजी क्षेत्र विरोधी नभएको स्पष्ट पारे । साथै, उनले आगामी बजेट ०४८ साल यताकै रूपान्तरणकारी र ऐतिहासिक आउने पनि बताए । 

‘नेपालको अर्थतन्त्रका लागि अब स्वर्णिम समय आउँदै छ, हल्ला र गलत अफवाहको पछि कोही पनि नलागौँ’, उनले भने, ‘सेयर बजारमा सबै भन्दा उदार पार्टी र घोषणापत्रमै स्पट धारणा राख्ने हामी हौँ, तर, अहिले अफवाह फैलाइँदै छ, यसको पछि नलाग्न म सबैलाई आग्रह गर्छु ।’

अर्थमन्त्रीसँगको भेटमा एशोसिएसनका प्रतिनिधिहरूले वर्तमान बजारमा सेयर बेचेर निस्किएका र बजारबाट सेयर उठाउन लागेका मानिसले बजारमा गलत हल्ला मच्चाइरहेको बताएका थिए । उनीहरूले संस्थागत लगानीकर्ताका लागि बजारमा सहजताको उपाय अपनाउनु जरुरी रहेको तर्क गरेका थिए ।