काठमाडौं- जबर्जस्ती करणी गरेको आरोपपछि पक्राउ परेका कलाकार सागर लम्साल (बले) लाई अदालत उपस्थित गराइएको छ ।

शनिबार कपनको बालुवाखानीस्थित घरबाट पक्राउ परेका उनलाई अहिले जिल्ला प्रहरी परिसर, भद्रकालीको हिरासतबाट आइतबार म्याद थपको लागि सरकारी वकिल कार्यलयमा लगिएको प्रहरीले जनाएको छ ।

कलाकार लम्सालमाथि अमेरिकामा रहँदै आएकी एक युवतीले बलात्कार आरोप लगाएकी थिइन् । उनले शुक्रबार बलेमाथि अमेरिकामै बलात्कार गरेको बताउँदै फेसबुकमा लेखेकी थिइन् ।

सोही आरोपबारे अनुसन्धानका लागि उनलाई पक्राउ गरिएको जिल्ला प्रहरी परिसर काठमाडौँका प्रमुख एसएसपी रमेश थापाले जानकारी दिए ।

एक वर्षअघि बले अमेरिका आएको बेला आफ्नो अपार्टमेन्टमै जबर्जस्ती गरेको युवतीको दाबी छ ।

आफू सानै उमेरदेखि डिप्रेसन र एन्जाइटी डिसअर्डरसँग जुधिरहेको बेला दाइ मानेको व्यक्तिबाट घृणित कार्य भएको उनले उल्लेख गरेकी थिइन् ।