काठमाडौं– इरानले अमेरिकी रेस्क्यू अपरेसनमा संलग्न एक विमान खसालेको दाबी गरेको छ।

इरानको अर्धसरकारी समाचार एजेन्सी फार्स न्युज एजेन्सीका अनुसार इस्लामिक रिभोल्युसनरी गार्ड कोर्प्स (आईआरजीसी) ले उक्त विमान इस्फहानको दक्षिणी क्षेत्रमा खसालेको जनाएको हो।

रिपोर्टअनुसार उक्त विमान हराइरहेका अमेरिकी अधिकारीको खोजीमा परिचालित थियो।

फार्सले आफ्नो टेलिग्राम च्यानलमार्फत् सार्वजनिक गरेको तस्वीरमा खेत क्षेत्रबाट बाक्लो धुवाँ उठिरहेको देखिएको दाबी गरिएको छ।

यसका साथै, उक्त घटनालाई अमेरिकी राष्ट्रपति डोनाल्ड ट्रम्पको ‘ठूलो हार लुकाउने प्रयास’ भनेर व्याख्या गरिएको छ।

यो दाबी त्यतिबेला आएको हो जब ट्रम्पले हराइरहेका अमेरिकी अधिकारीलाई सुरक्षित उद्धार गरिएको घोषणा गरे। यद्यपि, इरानको उक्त दाबी स्वतन्त्र रूपमा पुष्टि भइसकेको छैन।