चितवन– भरतपुरस्थित मालपोत कार्यालयमा अनधिकृत रूपमा प्रवेश गरेका ६ जना बिचौलियालाई प्रहरीले पक्राउ गरेको छ। बिहीबार उनीहरूलाई पक्राउ गरेको जिल्ला प्रहरी कार्यालय चितवनले जनाएको छ। 

कार्यालयका अनुसार, केही व्यक्तिहरू सेवाग्राहीलाई झुक्याएर ठगी गर्ने प्रयास गर्दै आएका थिए।

मालपोत कार्यालयले एक सूचना जारी गर्दै अब अनधिकृत व्यक्तिहरूको प्रवेशमा पूर्ण रोक लगाएको जनाएको छ।

अबदेखि सेवा लिन आउने व्यक्ति र कानुनअनुसार दर्ता भएका भू–सेवा सञ्चालकहरूलाई मात्र कार्यालय परिसरमा प्रवेश दिइनेछ। सेवासम्बन्धी कामकाज पनि सम्बन्धित व्यक्ति वा दर्ता भएका भू–सेवा सञ्चालकले पेश गरेका कागजातको आधारमा मात्र अगाडि बढाइनेछ।

साथै, भू–सेवा सञ्चालकहरूले कार्यालय प्रवेश गर्दा अनिवार्य रूपमा परिचयपत्र साथमा ल्याउनुपर्ने व्यवस्था गरिएको छ।