काठमाडौं– राष्ट्रिय स्वतन्त्र पार्टी रास्वपाका सभापति रवि लामिछानेले प्रतिनिधि सभामा प्रतिपक्षको भूमिकालाई सशक्त राख्नुपर्ने बताएका छन्।

प्रतिनिधि सभाको पहिलो बैठकमा सम्बोधन गर्दै उनले संसद्‌मा प्रतिपक्षीको आवाज कमजोर हुन नदिने प्रतिबद्धता जनाए। प्रतिपक्षको आवाज कमजोर हुँदा लोकतन्त्र नै कमजोर हुने उनको भनाइ छ।

‘हामी संसद्‌मा प्रतिपक्षको आवाज कमजोर बनाउँदैनौँ। हामीलाई थाहा छ, सदनमा प्रतिपक्षको आवाज कमजोर भयो भने लोकतन्त्र कमजोर हुन्छ,’ उनले भने।

उनले संसद्लाई बहस र विचार विमर्शको थलोका रूपमा विकास गर्नुपर्नेमा जोड दिए। ‘संसद बहसको थलो हुनेछ, प्रतिशोधको होइन,’ उनले भने, ‘विगतमा भएको राजनीतिक प्रतिशोधको अन्त्य गर्नेछौं।’

लामिछानेको अभिव्यक्तिलाई संसदीय अभ्यासलाई मर्यादित र संवादमुखी बनाउने प्रयासका रूपमा लिइएको छ।