काठमाडौं– नेपाल कम्युनिष्ट पार्टी (एमाले) ले संसदीय दलको नेतामा उपाध्यक्ष रामबहादुर थापा ‘बादल’लाई चयन गर्ने निर्णय गरेपछि पार्टीभित्र असन्तुष्टि चुलिएको छ।

युवा नेता सुहाङ नेम्बाङ र धनकुटाबाट तीन पटक निर्वाचित राजेन्द्र राईको दाबीलाई बेवास्ता गर्दै गरिएको निर्णयप्रति एमाले कार्यकर्ता, समर्थक तथा सर्वसाधारणमा समेत आक्रोश देखिएको छ।

यही विषयमा एमाले उपमहासचिव योगेश भट्टराईले सामाजिक सञ्जाल फेसबुकमार्फत असन्तुष्टि व्यक्त गरेका छन्।

उनले पार्टी अहिले गम्भीर चुनौतीको अवस्थाबाट गुज्रिरहेको उल्लेख गर्दै यस्तो बेला व्यापक पुनर्गठन र एकतामार्फत् जनविश्वास पुनःस्थापित गर्नुपर्ने बताएका छन्।

भट्टराईले निर्वाचनपछि पार्टीलाई धक्का लागेको, नेतृत्वप्रति जनगुनासो बढेको र समग्र आन्दोलन प्रतिकूल अवस्थाबाट गुज्रिरहेको उल्लेख गरेका छन्।

यस्तो अवस्थामा संसदीय दलको नेता चयन गर्ने प्रक्रियाले पार्टीपंक्तिलाई थप चिन्तित बनाएको उनको भनाइ छ।

उनले केही समय लिएर नेतृत्व र सांसदहरूबीच छलफलमार्फत् सहमति कायम गर्नुपर्नेमा हतारमा सांसदहरूलाई दबाबमा राखेर प्रक्रिया अघि बढाइएको आरोपसमेत लगाएका छन्।

एमालेभित्र बढ्दो असन्तुष्टिले आगामी दिनमा पार्टी एकता र आन्तरिक राजनीतिमा थप प्रभाव पार्ने संकेत देखिएको छ।