काठमाडौं- गत शनिबार पक्राउ गरिएका नेकपा एमालेका अध्यक्ष तथा पूर्वप्रधानमन्त्री केपी शर्मा ओलीको पक्षमा उभिँदा साइबर आक्रमणको शिकार भएकी अमिशा पराजुलीले प्रहरीमा उजुरी दिएकी छन् ।

ओलीको रिहाई माग गर्दै गत आइतबारदेखि भइरहेको प्रदर्शनमा सहभागी हुँदा खासगरी राष्ट्रिय स्वतन्त्र पार्टीका समर्थक र कार्कयर्ताहरूले उनको चरित्र हत्या गरेका थिए।

अमिशाले आफ्नो चरित्रहत्या गर्नेविरुद्ध भोटाहिटीस्थित साइबर ब्यूरोमा उजुरी दिएकी छन् । उनीसँगै आमा, दिदीसहित परिवारका सदस्य पनि साइबर ब्यूरो पुगेका छन् ।

साइबर ब्यूरोका प्रवक्ता प्रहरी उपरीक्षक दिलीप कुमार गिरीले अमिशाको उजुरी दर्ता भएको बताएका छन् । उनले उजुरी आइसकेकाले अब त्यसको विवरण अध्ययनपछि कारबाही अगाडी बढाउने जानकारी दिए ।

ओलीलाई जेन-जी आन्दोलनमा दमन गरेको आरोपमा पक्राउ गरिएपछि एमालेले गरेको विरोध प्रदर्शनमा अमिशा सहभागी थिइन् । त्यहीकारण उनीमाथि साइबर हिंसा भएको छ।

केही दिनयता अमिशालाई सामाजिक सञ्जालबाटै यौन हिंसा र बलात्कारसमेत गर्ने धम्की आइरहेको छ। कमेन्टमा गालीसँगै सामाजिक चेतना नभएका कन्टेन्ट क्रियटरलेसमेत उनको बदनाम गरिरहेका छन् । उनको नाम लिएर अश्लील र आपत्तिजनक शब्दको प्रयोग गर्नेको संख्या त अनगिन्ती छ।