काठमाडौं- प्रधानमन्त्री बालेन्द्र शाहले प्रतिनिधि सभामा निर्वाचित सबै दलका सांसदहरूसँग संवाद अघि बढाएका छन्।

संसद् अधिवेशन आह्वान भइनसकेको अवस्थामा शाहले सातै प्रदेशबाट निर्वाचित सबै दलका सांसदहरूसँग सोमबारदेखि संवाद अघि बढाएका हुन् ।

उनले सोमबार कोशी र कर्णाली प्रदेशबाट निर्वाचित सबै दलका सांसदहरूसँग सिंहदरबारमा संवाद गरे । त्यसक्रममा उनीसँग सांसदहरू दलका नेतामाथि भइरहेको धरपकडदेखि जनजीविकाका कुरा पनि उठाएका छन् ।

छलफलमा सहभागी धनकुटाबाट निर्वाचित नेकपा एमालेका सांसद राजेन्द्रकुमार राईले सरकारले विकासका निम्ति हतार गर्नुअघि विधि बसाउन सुझाव दिएको खबरहबलाई बताए ।

‘बलियो सरकार बनेसँगै विकासका निम्ति जुन हतार गर्नु भएको छ । त्यसका लागि पहिले विधि बनाउनुस्’, उनले प्रधानमन्त्री शाहलाई भने, ‘अर्को कुरा नेपालमा धेरै समस्या छन् । तिनलाई हल गर्न रोजगारी बढाउनुपर्छ, रोजगारीका अवसर ल्याउनुपर्छ, त्यसमा तपाईंहरूले काम गर्नुस् ।’

राईले नेपाललाई समृद्ध बनाउन अब सरकारद्वारा लामो समयदेखि प्रतिबन्धित गरिएको गाँजालाई वैधानिकता दिनुपर्ने पनि बताएका छन् ।

नेपालमा लामो समयदेखि गाँजालाई वैधानिकता दिन कानुन निर्माणको कोसिस भए पनि अझैसम्म सफल हुन सकेको छैन । केही सांसदहरूको व्यक्तिगत पहलमा विधेयक निर्माणको कोसिस भए पनि मूर्तरुप पाएको छैन । तर बालेन्द्र नेतृत्वमा शक्तिशाली सरकार बनेकाले अब गाँजा खेती खुलाउनुपर्ने कुरा आफूले उठाएको राईले बताएका छन् ।

‘अब तपाईं नेतृत्वको यो शक्तिशाली सरकारले गाँजा खेतीलाई वैधानिकता दिनुपर्यो’, उनले प्रधानमन्त्रीलाई भनेको प्रसंग सुनाउँदै खरबहलाई भने, ‘अर्कातिर पहाडी क्षेत्रका कृषकलाई धेरै दु:ख दिएकाले मैले बाँदर नियन्त्रणका उपायबारेको कुरा पनि उठाएँ ।’