ताप्लेजुङ – ताप्लेजुङको फक्ताङलुङ गाउँपालिका–५ स्थित अपर तमोर हाइड्रो कम्पनीमा कार्यरत एक युवक मृत अवस्थामा भेटिएका छन् ।

तेह्रथुमको म्याङ्लुङ नगरपालिका–१ गैरीका ४० वर्षीय यमराज लिम्बू गत फागुन ८ गते घर जान्छु भन्दै निस्किएका थिए। लामो समयसम्म सम्पर्कमा नआएपछि चैत १ गते उनका लागि खोजतलास गर्न हुलियासहित निवेदन परेको थियो।

जिल्ला प्रहरी कार्यालय ताप्लेजुङले जनाएको छ कि आइतबार फक्ताङलुङ गाउँपालिका–२ मेथेन खोलमा सडेगलेको अवस्थामा लिम्बूको शव फेला परेको हो। घटनास्थलमा पुगेर अनुसन्धान गर्ने क्रममा मृतकको बाँया हातमा रहेको ट्याटुको आधारमा शवको पहिचान गरिएको थियो।

शव पोस्टमार्टमका लागि जिल्ला अस्पताल ताप्लेजुङमा पठाइएको छ भने घटनाबारे थप अनुसन्धान जारी छ।