वासिङ्टन- अमेरिकी राष्ट्रपति डोनाल्ड ट्रम्पले इरानको तेल आफ्नो नियन्त्रणमा लिन चाहेको बताएका छन्। आइतबार फाइनान्सियल टाइम्सलाई दिएको अन्तर्वार्तामा उनले यस्तो बताएका हुन्।

ट्रम्पले भने, ‘साँचो भन्नुपर्दा मेरो मनपर्ने कुरा भनेको इरानको तेल लिनु हो। यसका लागि अमेरिकासँग धेरै विकल्प छन्।’

उनले थपे, ‘अमेरिकामा केही मानिसहरू सोध्छन्, तपाईं यस्तो किन गर्दै हुनुहुन्छ? तर उनीहरू मुर्ख हुन्।’

उनले खार्ग आइसल्यान्डबारे पनि उल्लेख गरेका छन् । ‘हामी खार्ग द्वीप लिन सक्छौँ वा नलिन पनि सक्छौँ’, उनले भने । ट्रम्पका अनुसार उक्त द्वीपमा इरानको सुरक्षा बलियो नभएकाले अमेरिका सजिलै कब्जा गर्न सक्छ।

खार्ग द्वीप फारसको खाडीको उत्तरी भागमा अवस्थित छ । जुन इरानको प्रमुख तेल केन्द्र हो। यहीँबाट करिब ९० प्रतिशत इरानी तेल निर्यात हुन्छ।

ट्रम्पले इरानसँगको युद्ध अन्त्यका लागि छिट्टै सम्झौता हुन सक्ने बताएका छन्। तर उनले चेतावनी दिँदै भने, ‘यदि तेहरानले अमेरिकी प्रस्ताव नमाने देश नै बाँकी नहुन सक्छ।’