काठमाडौं – श्रम, रोजगार तथा सामाजिक सुरक्षा मन्त्रालयले श्रम स्वीकृतिमा रहेको टोकन प्रणाली हटाउँदै आवेदन दिएको दिनमै स्वीकृति दिने व्यवस्था सुरु गर्ने भएको छ ।

मन्त्रालयमा आइतबार बसेको बैठकले नेपाल सरकार मन्त्रिपरिषद्को मिति २०८२ चैत १३ गते स्वीकृत शासकीय सुधारसम्बन्धी १०० कार्यसूचीमाथि छलफल गर्दै उक्त निर्णय कार्यान्वयनमा ल्याएको हो ।

बैठकमा श्रम, रोजगार तथा सामाजिक सुरक्षा मन्त्री दीपक कुमार शाहले श्रम तथा रोजगार क्षेत्रलाई व्यवस्थित, सुरक्षित र मर्यादित बनाउन तथा श्रमिकको हकहित संरक्षण गर्न मन्त्रालयसँग सम्बन्धित कार्यसूचीमा तत्काल कार्ययोजना बनाएर कार्यान्वयन गर्न निर्देशन दिएका छन् ।

मन्त्रालयका अनुसार वैदेशिक रोजगारीमा रहेका नेपालीको सुरक्षा, न्यूनतम ज्यालाको सुनिश्चितता, कार्यस्थल सुरक्षा, स्वास्थ्य अवस्था तथा कार्य वातावरणको अध्ययन गरी वैदेशिक रोजगारीका न्यूनतम मापदण्ड तयार गरिनेछ। साथै, सीप विकास तालिममार्फत रोजगारीका अवसर सिर्जना गर्ने, सबै प्रदेशमा निजी क्षेत्रसँग सहकार्य गरी सीप मेला सञ्चालन गर्ने र आन्तरिक रोजगारी प्रवर्द्धन गर्ने योजना अघि सारिएको छ।

यस्तै, वैदेशिक रोजगारीका नाममा हुने ठगी नियन्त्रण गर्ने, सेवा प्रवाहलाई सूचना प्रविधिमा आधारित बनाउने तथा सेवाग्राहीमैत्री बनाउने विषयमा पनि जोड दिइएको छ।