काठमाडौं- फिलिपिन्सले दक्षिण चीन सागरमाथि चीनले गर्दै आएको सार्वभौमसत्ताको दाबीलाई अस्वीकार गरेको छ । चिनियाँ दूतावासले एक फिलिपिनो कूटनीतिज्ञले विवादित ‘स्कारबोरो शोल’ टापु फिलिपिन्सको होइन भनी स्वीकार गरेको दाबी गरेको थियो ।

फिलिपिन्सले सोमबार सो दाबीको खण्डन गर्दै समुद्री क्षेत्रको अधिकार अन्तर्राष्ट्रिय कानुनअनुसार तय हुने बताएको छ । फिलिपिन्सको परराष्ट्र मन्त्रालयका प्रवक्ता रोजेलियो भिलानुभाले समुद्री दाबीहरू सामाजिक सञ्जालका पोस्टबाट नभई कानुनी प्रक्रियाबाट समाधान हुनुपर्ने बताए । उनले ‘स्कारबोरो शोल’ र अन्य टापुहरूमा फिलिपिन्सको लामो समयदेखि अविभाज्य अधिकार रहेको स्पष्ट पारे ।

यता मनिलास्थित चिनियाँ दूतावासले भने आफूहरूले पूरै दक्षिण चीन सागरलाई आफ्नो भूभाग नभनेको दाबी गरेको छ । अहिले ‘स्कारबोरो शोल’ टापु चीनको तटीय रक्षक बलको नियन्त्रणमा छ ।

यो क्षेत्र फिलिपिन्सको तटबाट २०० किलोमिटर टाढा र उसको विशेष आर्थिक क्षेत्रभित्र पर्दछ । यो ठाउँ माछा मार्न र जहाजहरूको सुरक्षाका लागि निकै महत्त्वपूर्ण मानिन्छ ।

पछिल्ला वर्षहरूमा यस क्षेत्रलाई लिएर दुई देशका जहाजहरूबीच पटक-पटक मुठभेड समेत हुँदै आएको छ। सन् २०१६ मा अन्तर्राष्ट्रिय मध्यस्थता अदालतले दक्षिण चीन सागरमा चीनको दाबीको कुनै कानुनी आधार नभएको फैसला सुनाएको थियो ।

तर चीनले सो ऐतिहासिक फैसलालाई अहिलेसम्म मान्न अस्वीकार गर्दै आएको छ । फिलिपिन्सले भने चीनले आफ्नो समुद्री क्षेत्रमा आक्रामक गतिविधि बढाएको आरोप लगाउँदै आएको छ ।