काठमाडौं- भारतको ऊर्जा मन्त्रालयले आगामी एक दशकमा भारतको सौर्य ऊर्जा क्षमता चार गुणाले बढ्ने प्रक्षेपणसहितको प्रतिवेदन सार्वजनिक गरेको छ । प्रतिवेदनमा वायु ऊर्जाको क्षमता पनि तीन गुणाले वृद्धि हुने अपेक्षा गरिएको छ ।

केन्द्रीय विद्युत प्राधिकरणले राष्ट्रिय उत्पादन पर्याप्तता योजनामार्फत यो विवरण सार्वजनिक गरेको हो । नवीकरणीय ऊर्जामा हुने यो वृद्धिले कोइलामाथिको निर्भरता घटाउनेछ ।

हाल भारतको विद्युत उत्पादनमा कोइलाको हिस्सा ७० प्रतिशतभन्दा बढी छ । सन् २०३५-३६ सम्ममा यो घटेर ४९ प्रतिशतमा झर्ने अनुमान गरिएको छ ।

सन् २०३५-३६ सम्ममा गैर-जीवाश्म इन्धनको कुल क्षमता ७८६ गिगावाट पुग्ने प्राधिकरणको अनुमान छ । यसमा सौर्य ऊर्जाको हिस्सा ६५ प्रतिशत रहनेछ ।

सोही अवधिमा आणविक ऊर्जाको क्षमता पनि तीन गुणाले बढेर २२ गिगावाट पुग्नेछ । ठूला जलविद्युत आयोजनाको क्षमता ५० प्रतिशतले बढेर ७७ गिगावाट पुग्ने प्रतिवेदनमा उल्लेख छ ।

सबैभन्दा ठूलो फड्को ‘पम्प स्टोरेज’ जलविद्युतमा देखिनेछ। यसको क्षमता १३ गुणाले बढेर ९४ गिगावाट पुग्ने प्रक्षेपण गरिएको छ। साथै ब्याट्री भण्डारण क्षमता पनि हालको नगन्य अवस्थाबाट बढेर ८० गिगावाट पुग्नेछ।