काठमाडौं- अस्ट्रेलियाका एक व्यवसायी विदेशी हस्तक्षेपको मुद्दामा दोषी ठहरिएका छन् । ५९ वर्षीय अलेक्जेन्डर सेर्गोलाई सिड्नीको एउटा अदालतले शुक्रबार दोषी प्रमाणित गरेको हो ।

उनले चिनियाँ जासुस हुन सक्ने शङ्कास्पद व्यक्तिहरूलाई सहयोग गरेका थिए । यस कसुरमा उनलाई १५ वर्षसम्मको जेल सजाय हुन सक्ने प्रावधान छ ।

सेर्गो सांघाईमा काम गरिरहेका बेला केन र इभलिन नामका दुई व्यक्तिले उनलाई पैसाको प्रलोभन देखाएका थिए । उनीहरूले अस्ट्रेलियाको राष्ट्रिय सुरक्षासँग सम्बन्धित जानकारी मागेका थिए ।

सेर्गोले उनीहरूलाई लिथियम खानी, फलाम खानी र सुरक्षा सम्झौताका विषयमा प्रतिवेदन बुझाएका थिए । ती प्रतिवेदनका बदलामा उनले खाममा राखेर हजारौँ डलर नगद बुझ्ने गर्दथे ।

सरकारी वकिलहरूका अनुसार ती भेटघाटहरू प्रायः खाली रेस्टुरेन्ट र क्याफेहरूमा हुने गर्दथे । सेर्गोले ती व्यक्तिहरू चिनियाँ गुप्तचर निकायका लागि काम गर्छन् भन्ने थाहा पाउँदापाउँदै पनि सूचना आदानप्रदान गरेको अदालतमा दाबी गरिएको छ ।

सन् २०२३ मा अस्ट्रेलिया फर्केपछि उनलाई बन्डीस्थित आफ्नै निवासबाट पक्राउ गरिएको थियो । सन् २०१८ मा लागू भएको नयाँ जासुसी विरोधी कानुन अन्तर्गत दोषी ठहरिने उनी दोस्रो अस्ट्रेलियाली नागरिक हुन् ।