काठमाडौं- जर्मनीको पोट्सड्याममा तिब्बती अधिकारसम्बन्धी कार्यक्रम आयोजना गरिएको छ । कार्यक्रममा जर्मनी र सहरको झण्डासँगै तिब्बती झण्डा पनि फहराइएको थियो ।

कार्यक्रममा शहरकी सुरक्षा र सामाजिक मामिला काउन्सिलर ब्रिजिट मेयरले दलाई लामासँगको आफ्नो भेट स्मरण गरिन् । उहाँले तिब्बती संस्कृति र धर्म बचाउनु निकै महत्त्वपूर्ण रहेको भन्दै चीनको कूटनीतिक दबाबका बाबजुद दलाई लामालाई म्युनिखमा स्वागत गर्दा मानिसहरूको ठूलो उत्साह देखिएको चर्चा गरिन् ।

जेनेभास्थित तिब्बत ब्युरोकी प्रतिनिधि थिन्ले चुक्कीले चिनियाँ कब्जाका क्रममा ज्यान गुमाउने तिब्बतीहरूको सम्मान गरिन् ।उनले तिब्बतभित्र भइरहेको दमनबारे चर्चा गर्दै १० लाखभन्दा बढी तिब्बती बालबालिकालाई आवासीय विद्यालयमा राखिएको र उनीहरूलाई आफ्नो भाषा, संस्कृति र धर्म सिक्न रोक लगाइएको जनाइन् ।

जर्मनीमा तिब्बती झण्डा फहराउने अभियान सुरु भएको ३० वर्ष पुगेको छ । यसै कार्यक्रममा तिब्बत इनिसिएटिभ डोइचल्याण्ड नामक संस्थाले काउन्सिलर मेयरलाई सम्मान समेत गरेको थियो ।