काठमाडौं- अमेरिकामा बसोबास गर्ने भारतीय मूलका मानिसहरू त्यहाँको सबैभन्दा धेरै कमाउने समुदाय बनेका छन् । प्यु रिसर्च सेन्टरको पछिल्लो प्रतिवेदन अनुसार भारतीय अमेरिकीहरूको औसत वार्षिक आम्दानी १ लाख ५१ हजार २०० डलर पुगेको छ ।

यो आम्दानी अमेरिकाको राष्ट्रिय औसत आम्दानी ८३ हजार ७०० डलरभन्दा निकै बढी हो । तथ्याङ्क अनुसार एक सामान्य अमेरिकी परिवारको तुलनामा भारतीय परिवारले वार्षिक करिब ६७ हजार डलर बढी कमाउँछन् ।

यो आम्दानी अन्य एसियाली समुदायको तुलनामा पनि धेरै छ । ताइवानी मूलका अमेरिकीहरूको औसत आम्दानी १ लाख ३३ हजार ३०० डलर रहेको छ ।

यसरी हेर्दा भारतीयहरू ताइवानीहरू भन्दा पनि करिब १४ प्रतिशतले अगाडि छन् । अमेरिकाको कुल जनसंख्यामा भारतीयहरूको हिस्सा मात्र १.४ प्रतिशत रहेको छ ।

त्यहाँ करिब ४८ लाख भारतीय मूलका मानिसहरू बस्छन् । थोरै संख्यामा भए पनि उनीहरूले अमेरिकाको अर्थतन्त्रमा ठूलो योगदान दिएका छन् ।

विशेषगरी प्राविधिक र व्यावसायिक क्षेत्रमा उनीहरूको सहभागिता निकै बलियो छ । आम्दानी धेरै भएकै कारण उनीहरूले तिर्ने करको हिस्सा पनि ठूलो छ ।

भारतीय अमेरिकीहरूले अमेरिकाको कुल संघीय करमा करिब ६ प्रतिशत योगदान पुर्‍याउँछन् । यस प्रतिवेदनले भारतीय समुदाय अमेरिकाको आर्थिक र व्यावसायिक क्षेत्रमा कति प्रभावशाली छ भन्ने प्रष्ट पारेको छ ।