काठमाडौं- नेपाली कांग्रेसको केन्द्रीय कार्यसमितिको बैठक बुधबार बिहान ११ बजे बस्ने गरी स्थगित भएको छ ।

बैठकका एजेन्डामाथि केन्द्रीय सदस्यहरू बोल्ने क्रम बाँकी भएको कारण बुधबार फेरि बस्ने गरी बैठक स्थगित भएको पार्टी प्रवक्ता देवराज चालिसेले जानकारी दिए । उनका अनुसार, बैठकमा मंगलबार २८ जना केन्द्रीय सदस्यहरूले धारणा राखेका छन् ।

बैठकमा संविधान संशोधन अध्ययनका लागि विज्ञ समिति गठन, १५औँ महाधिवेशन तयारी, उमेदवारसँग प्रदेशस्तरीय निर्वाचन समीक्षा, प्रदेश तथा स्थानीय सरकारको प्रभावकारी सञ्चालन र भ्रातृ संघ, शुभेच्छुक संस्था तथा जनसम्पर्क समितिलगायत विषयमा बाँकी केन्द्रीय सदस्यहरूले धारणा राख्ने प्रवक्ता चालिसेले बताए ।

“हामीले विभिन्न ११ वटा बैठकका एजेन्डाहरू तय गरेका छौँ । आज यी एजेन्डाहरूमाथि २८ जना केन्द्रीय सदस्यहरूलेआफ्नो धारणा राखिसक्नुभएको छ । बाँकी साथीहरूले भोलिको बैठकमा भाग लिनुहुनेछ,” चालिसेले भने, “भोलि नै हामी सबै विषयहरूमा निष्कर्षमा पुग्नेछौँ । सबै कुराहरू छलफलकै क्रममा रहेकोले आज केही निर्णय भएको छैन ।”

मंगलबारको बैठकको सुरुमा सभापति गगनकुमार थापाले अगामी भदौ २४–२६ गतेसम्म १५औँ अधिवेशन गर्ने कार्यतालिका प्रस्ताव गरेका थिए ।