काठमाडौं– तिलगंगा आँखा प्रतिष्ठान र ग्लोबल आइएमई बैंक लिमिटेड बीच आर्थिक रुपमा कमजोर, जेष्ठ नागरिक तथा विपन्न वर्गका नागरिकहरुको मोतिबिन्दुको पहिचान गरी निःशुल्क शल्यक्रिया गर्ने सम्बन्धी समझदारी भएको छ ।

मंगलबार कमलादीस्थित बैंकको कर्पोरेट कार्यालयमा आयोजित समारोहमा उक्त समझदारीपत्रमा बैंकका प्रमुख कार्यकारी अधिकृत सुरेन्द्रराज रेग्मी र प्रतिष्ठानका प्रमुख कार्यकारी अधिकृत डा. रिता गुरुङ ले हस्ताक्षर गरेका हुन् । कार्यक्रममा बैंकका अध्यक्ष तथा नेपाल उद्योग वाणिज्य महासंघका अध्यक्ष चन्द्रप्रसाद ढकाल तथा प्रतिष्ठानका संस्थापक एवं कार्यकारी निर्देशक डा. सन्दुक रुइटको उपस्थिति रहेको थियो । 

हस्ताक्षरपछि दुवै पक्षका प्रतिनिधिहरूले समझदारीपत्र आदानप्रदान गरेका छन् । समझदारीअनुसार, प्रतिष्ठानले बैंकको वित्तीय सहयोगमा देशका सातै प्रदेशका सात स्थानमा आर्थिक रुपमा कमजोर, जेष्ठ नागरिक तथा विपन्न वर्गका नागरिकहरूको निःशुल्क मोतिबिन्दु पहिचान र शल्यक्रिया गर्नेछ ।

यसैगरी, विद्यालयमा अध्ययनरत आर्थिक रुपमा कमजोर तथा विपन्न छात्र–छात्राहरूको आँखा परीक्षण गरी आवश्यकता अनुसार निःशुल्क चस्मा वितरण गर्ने पनि सहमति भएको छ ।

हस्ताक्षर कार्यक्रममा बैंकका नायब प्रमुख कार्यकारी अधिकृत सुमन पोखरेल, बैंकका उच्च पदस्थ कर्मचारी तथा प्रतिष्ठानका कर्मचारीहरूको उपस्थिति रहेको थियो ।