काठमाडौं- लेबनानको दक्षिणी सीमा क्षेत्रमा हेज्बोल्लाहविरुद्ध लडिरहेको इजरायलले हवाई आक्रमण तीव्र पारेको छ । पूर्वी सीमावर्ती क्षेत्र खियाम र नबातेहदेखि टायर नजिकैको शहाबिए नगरपालिकासम्म इजरायलले हवाई आक्रमण गरेको हो ।

लेबनानको राष्ट्रिय समाचार एजेन्सीका अनुसार ती आक्रमणमा परी कम्तीमा एक जनाको ज्यान गएको छ । इजरायली सेनाले सीमा नजिकैका गाउँहरूमा स्थल सैन्य कारबाहीलाई सघाउन यी हवाई हमलाहरू जारी राखेको जनाएको छ ।

विशेषगरी खियाम सहरभित्र इजरायली सेना प्रवेश गरी कारवाही चलाइरहे पनि अझैसम्म त्यहाँ पूर्ण नियन्त्रण कायम गर्न सकेको छैन । यता हेज्बोल्लाहले पनि उक्त सहर वरपर रहेका इजरायली सैनिकहरूलाई लक्षित गरी निरन्तर रकेट प्रहार गरिरहेको छ ।

पछिल्लो २४ घण्टामा हिजबुल्लाहले अहिलेसम्मकै धेरै सैन्य कारबाहीहरू गरेको दाबी गरेको छ । इरानसमर्थित उक्त शिया लडाकु समूहका अनुसार उनीहरूले ६३ वटा अपरेशन गरेका छन् जसमा अधिकांश रकेट आक्रमणका साथै ड्रोन र आर्टिलरी प्रहार समेत सामेल छन् ।

यस युद्धका कारण नागरिक पूर्वाधारहरूमा ठूलो क्षति पुगेको छ । इजरायली सेनाले तटीय राजमार्गको मुख्य पुलसहित अन्य पुलहरूलाई निशाना बनाएको छ । आज बिहान सार्वजनिक भएका तस्बिरहरूमा पहिले नै आक्रमणमा परेका तर पूर्ण रूपमा ध्वस्त नभएका पुलहरूमा पनि थप क्षति पुगेको देखिएको छ ।