काठमाडौँ- नेपाली कांग्रेसले इरानी सेनाको नियन्त्रणमा रहेका नेपाली नागरिक अमृत झालाई तत्काल मुक्त गराई स्वदेश फर्काउन सरकारसँग माग गरेको छ।

ललितपुरको सानेपामा चैत ६ देखि ८ गतेसम्म चलेको पार्टीको केन्द्रीय कार्यसमिति बैठकले झाको सुरक्षित रिहाइका लागि कूटनीतिक पहल गर्न सरकारको ध्यानाकर्षण गराएको हो। उनी यूएईबाट जहाजमा तेल लिन गएका इरानी सेनाको नियन्त्रणमा परेका हुन् ।

मध्यपूर्वमा चर्किएको युद्धका कारण त्यहाँ रहेका लाखौँ नेपालीहरूको सुरक्षा अवस्थाप्रति कांग्रेसले गम्भीर चिन्ता व्यक्त गरेको छ।

प्रवक्ता देवराज चालीसेद्वारा जारी विज्ञप्तिमा विश्वशान्तिको अपरिहार्यतालाई महसुस गर्दै युद्धको अन्त्य हुने अपेक्षा गरिएको छ।

साथै, युद्धग्रस्त क्षेत्रमा रहेका नेपालीहरू असुरक्षित रहेकाले उनीहरूको आवश्यक सुरक्षा प्रबन्ध मिलाउन र जोखिममा परेका नागरिकहरूलाई उद्धार गर्न कांग्रेसले सरकारलाई आग्रह गरेको छ।