काठमाडौं– यातायात व्यवसायी राष्ट्रिय महासंघले सरकारलाई तत्काल सार्वजनिक यातायात व्यवस्थापन गर्न अनुरोध गरेको छ । महासंघका महासचिव सरोज सिटौलाले सरकारले तत्काल ऊर्जा खपतको वैकल्पिक उपाय अपनाउनुपर्ने सुझाव दिँदै सार्वजनिक यातायात व्यवस्थापन गर्न आग्रह गरेका हुन् ।

‘हामीले सरकारलाई बारम्बार सवारी साधनलाई जोरबिजोर गरेर सञ्चालन गर्न सुझाएका छौँ ।’ खबरहबसँगको कुराकानीमा उनले भने, ‘यसबारे विभाग वा मन्त्रालय कसैको पनि चासो देखिएको छैन ।’

यद्यपि सरकारले निजी सवारीलाई निरुत्साहित गर्न र विद्युतीय सवारीलाई बढावा दिन नचाहेको उनको भनाइ छ ।

‘कर्मचारिले निरन्तर मूल्य बढाउने घोषणा गरिरहेका छन् केही दिनमै पेट्रोलमा पनि भारी वृद्धि हुँदैछ तर निजी सवारी कम सञ्चालन गर्ने, बिजुलीबाट चल्ने यातायातलाई बढावा दिनेतिर सरकार लागेको छैन,’ उनले भने ।

महासंघले भाडादर समायोजनको लागि पठाएकोमा समेत विभागले बेवास्ता गरेको उनको गुनासो छ । ग्यासबाट चल्ने निलो रङ्गो माइक्रो उपत्यकामा चल्न पातलिएको भन्दै उनले यातायातका समस्या अझै चुलिने उनले बताए ।