काठमाडौँ – नेकपा एमालेभित्रका विषयहरू बैठकमै उठाउनुपर्ने कि सामाजिक सञ्जालमार्फत सार्वजनिक गर्नुपर्ने भन्ने विषयमा बहस चर्किएको छ। पछिल्ला दिनहरूमा नेताहरूबीच यसबारे फरक–फरक धारणा सार्वजनिक हुन थालेका छन्।

नेता सुरेन्द्र पाण्डेले पार्टीभित्र सुधारका प्रस्तावहरू पटक–पटक आधिकारिक फोरम र बैठकमा प्रस्तुत गरिए पनि ती विषयलाई गम्भीरतापूर्वक छलफल नगरिएको आरोप लगाएका हुन् ।

बैठकहरूमा उठाइएका असहमतिका आवाजहरूलाई ‘नोट अफ डिसेन्ट’को सीमित दायरामा राखिएको र त्यसलाई संस्थागत रूपमा सम्बोधन नगरिएको उनको गुनासो छ ।

उनका अनुसार बैठकहरू विचार–विमर्श गर्ने थलोभन्दा औपचारिकता मात्र पूरा गर्ने माध्यम बन्न थालेका छन्।

“जब बैठक सुन्ने र सुधार्ने ठाउँ होइन, केवल सुनाउने र आदेश दिने थलो बन्छ, त्यहाँ विवेकभन्दा अहंकार हाबी हुन्छ,” उनले भने ।

यही सन्दर्भमा पार्टीका विषयहरू सामाजिक सञ्जालमा उठाउनु उपयुक्त हो कि होइन भन्ने प्रश्नसमेत उनले गरेका छन् ।

पार्टीको आगामी कार्यदिशा ‘बन्द कोठा’को सीमित निर्णय प्रक्रिया वा केही व्यक्तिको गणनाबाट होइन, आम कार्यकर्ताको भावना र आधुनिक कार्यपद्धतिअनुसार अघि बढ्नुपर्ने उनको भनाइ छ ।