काठमाडौं – कलाकार सीताराम कट्टेल ‘धुर्मुस’ अमेरिका गएपछि अर्को नायक राखेर फिल्म ‘पाँच पाण्डव’को छायाङ्कन सुरू गरिएको छ ।

निर्देशक वसन्त निरौलाले झापाको काँकडभिट्टाबाट सोमबारदेखि फिल्मको छायाङ्कन सुरू गरेका हुन् ।

यस फिल्ममा पाँचजना नायकहरू हरिवंश आचार्य, जितु नेपाल, आर्यन सिग्देल, महेश त्रिपाठी र सागर लम्साल ‘बले’ छन् ।

महिलातर्फ शीर्ष कलाकारको भूमिका दीपाश्री निरौला र जनी गुरुङ छन् ।

गत कात्तिकमा यो फिल्मको निर्माण घोषणा गर्दा हरिवंश, धुर्मुस, जितु नेपाल र सागर पाँच पाण्डवको भूमिकामा देखिने बताइएको थियो ।

तर फिल्म घोषणा भएपछि छोरीको उपचारको कारण देखाउँदै धुर्मुस अमेरिका हान्निए । उनी उतै बस्ने गरी गएको चर्चा फिल्मी वृत्तमा छ ।

उक्त खबर बाहिरिएपछि जनस्तरबाट पैसा उठाएर बनाउन थालिएको चितवनस्थित गौतमबुद्ध अन्तर्राष्ट्रिय क्रिकेट रंगशाला पूरा गर्न नसेककाले धुर्मुस विदेशिको चर्चा चलेको थियो ।

निर्देशक निरौलाले छोरीको उपचार गराएर ‘धुर्मुस’ फर्किएपछि फिल्मको छायाङ्कन सुरू गर्ने बताउँदै आएका थिए ।

धुर्मुस नेपाल फर्किने छनक नदेखिएपछि निरौलाले उनको स्थानमा आर्यनलाई लिएर छायाङ्नमा निस्किएका हुन् ।

काली रानी फिल्मसको ब्यानरमा बन्ने यस फिल्मका लेखक सुशील पौडेल र निर्माता नवीन श्रेष्ठ हुन् ।

४० दिनको छायाङ्कन तालिका लिएर निर्देशक निरौला यतिबेला झापा पुगेका छन् । फिल्मको सबै भाग झापामै छायाङ्कन हुने उनले बताए ।