काठमाडौं– प्रहरीको केन्द्रीय अनुसन्धान ब्युरो (सीआईबी) ले काठमाडौंबाट एकजना फरार प्रतिवादीलाई पक्राउ गरेको छ ।

उनलाई ६ वर्ष कैद र साढे २२ करोडभन्दा बढी जरिवाना तोकिएकोमा चैत १ गते काठमाडौंबाट पक्राउ गरिएको सीआईबीका प्रवक्ता तथा प्रहरी वरिष्ठ उपरीक्षक शिवकुमार श्रेष्ठले जानकारी दिएका छन् ।

श्रेष्ठका अनुसार, पक्राउ पर्नेमा योगेन्द्रप्रसाद श्रेष्ठ रहेका छन् । उनीविरुद्ध सर्वोच्च अदालतले २२ करोड ६७ लाख ४१ हजार ३४३ रुपैयाँ नौ पैसा जरिबाना र ६ (छ) वर्ष कैद सजाय ठहर गरेको थियो ।

प्रवक्ता श्रेष्ठका अनुसार योगेन्द्रप्रसाद श्रेष्ठमाथि दुईवटा मुद्दामा सर्वोच्च अदालतले उक्त ठहर गरेको थियो । उनलाई सीआईबीको टोलीले चैत १ गते काठमाडौंको नागार्जुन नगरपालिका-५ सितापाइलाबाट पक्राउ गरेको हो । उनलाई फैसला कार्यान्वयनका लागि जिल्ला अदालतमा पेस गरिएको सीआईबीले जानकारी दिएको छ ।