काठमाडौं– काठमाडौंमा जारी एन्फा राष्ट्रिय लिगमा जावलाखेल युथ क्लबले काक्रेबिहार क्लबलाई पराजित गरेको छ ।  

आइतबार सातदोवाटोस्थीत एन्फा कम्प्लेक्समा भएको खेलमा जावलाखेलले काक्रेबिहारलाई ४–१ गोल अन्तरले पराजित गरेको हो ।

खेलमा पहिलो गोल भने काक्रेबिहारका दिपेन्द्र छुनाराले खेलको छैठौ मिनेटमा गरेका थिए । तर खेलको १६ औं मिनेटमा जावलाखेलका  बुबाकार सिसोखोले गोल गर्दै बराबरीमा ल्याएका थिए । 

त्यस्तै खेलको ५० औं मिनेटमा निकोलश हामिल्टन र ६४औं मिनेटमा विकास दर्लामीले गोल गरेका थिए भने दोश्रो हाफको इन्जुरी समयमा निकोलश हामिल्टनले अर्को गोल गरेका थिए । 

जितसंगै १० खेलबाट जावलाखेलको १३ अंक भएको छ भने समान खेल खेलेको काक्रेबिहारको एक अंक रहेको छ ।