काठमाडौं – काठमाडौंमा जारी एन्फा राष्ट्रिय लिगअन्तर्गत शनिबार भएको खेलमा सातदोबाटो युथ क्लब र नवजनजागृति क्लब १–१ गोलको बराबरीमा रोकिएका छन्।

सातदोबाटोस्थित एन्फा कम्प्लेक्समा भएको प्रतिस्पर्धात्मक खेलमा नवजनजागृतिले पहिले अग्रता लिएको थियो। खेलको २६औं मिनेटमा विक्रम थोकरले गोल गर्दै टोलीलाई १–० को अग्रता दिलाएका थिए।

दोस्रो हाफको सुरुमै सातदोबाटोले खेलमा फर्कने अवसर पायो। खेलको ४८औं मिनेटमा अरुण लामाले गोल गर्दै खेललाई १–१ को बराबरीमा ल्याए।

त्यसपछि दुवै टोलीले थप गोल गर्ने प्रयास गरे पनि सफल हुन सकेनन् र खेल बराबरीमै सकियो।

यस बराबरीसँगै नवजनजागृति क्लबले १० खेलपछि प्रतियोगितामा पहिलो अंक जोड्न सफल भएको छ। समान १० खेल खेलेको सातदोबाटो युथ क्लबको भने ८ अंक पुगेको छ।