काठमाडौं- बंगलादेशका लागि भारतका उच्चायुक्त प्रणय वर्माले भारतले सधैँ लोकतान्त्रिक, स्थिर, शान्तिपूर्ण र समावेशी बंगलादेशको समर्थन गर्ने बताएका छन् । ढाकामा इफ्तार समारोहलाई सम्बोधन गर्दै उनले यस्तो बताएका हुन् ।

बंगलादेश सरकारका वरिष्ठ मन्त्रीहरू, विभिन्न दलका राजनीतिक नेताहरू र नागरिक समाजका प्रबुद्ध व्यक्तित्वहरूको उपस्थिति रहेको उक्त कार्यक्रममा वर्माले दुई देशबीचको सम्बन्ध ‘जनता-केन्द्रित’ रहेको र यसको आधार सन् १९७१ को मुक्ति युद्धको साझा बलिदानमा अडिएको उल्लेख गरे । दुई देशबीचको प्रगाढ सांस्कृतिक र ऐतिहासिक सम्बन्धको चर्चा गर्दै उच्चायुक्त वर्माले भारत र बंगलादेश अहिले नयाँ भविष्यको संघारमा रहेको र साझा समृद्धिका लागि मिलेर काम गर्न तयार रहेको बताए ।

उनले बंगलादेशको स्थानीय सरकार तथा ग्रामीण विकास मन्त्री मिर्जा फख्रुल इस्लाम आलमगीरसँग पनि शिष्टाचार भेट गरी ग्रामीण अर्थतन्त्र, कृषि सहकारी र तल्लो तहको आर्थिक सशक्तीकरणका क्षेत्रमा सहयोग बढाउने विषयमा छलफल गरेका छन् ।

भारतले बंगलादेशसँग सकारात्मक, रचनात्मक र भविष्यमुखी ढंगले सहकार्य गर्न चाहेको र आपसी हितका सबै क्षेत्रमा जनता-जनताबीचको सम्बन्धलाई अझ सुदृढ बनाउन प्रतिबद्ध रहेको सन्देश वर्माले दिएका छन् । दक्षिण एसियाको स्थिरताका लागि बंगलादेशको प्रगति र समावेशिता महत्वपूर्ण रहेको भारतको ठहर छ।