काठमाडौं- बलुचिस्तानको पन्जगुर जिल्लास्थित कोह साब्ज पलान्तक क्षेत्रमा पाकिस्तानी सुरक्षा बलको गोली प्रहारबाट एक जना कानुन व्यवसायीको ज्यान गएको छ । सुरक्षा बलको गोली लागेर कानुन व्यवसायी हम्मल हस्सानीको मृत्यु भएको छ । स्थानीय स्रोतका अनुसार हस्सानी पन्जगुरतर्फ यात्रा गरिरहेका बेला साँझको समयमा सुरक्षाकर्मीहरूले उनीमाथि गोली चलाएका थिए ।

मानव अधिकारवादी संस्थाहरूले यो घटनालाई बलुचिस्तानमा लामो समयदेखि चल्दै आएको राज्य-संरक्षित हिंसाको एक हिस्साको रूपमा व्याख्या गरेका छन् । यस क्षेत्रमा सर्वसाधारणलाई पक्राउ गरी बेपत्ता पार्ने वा मुठभेडको नाममा हत्या गर्ने गरिएको आरोप लाग्दै आएको छ । हत्याको विरोधमा बलुचिस्तानका कानुन व्यवसायीहरू आन्दोलित भएका छन् ।

बलुचिस्तान बार काउन्सिलले सोमबार मार्च ९ का दिन प्रान्तभर हड्तालको आह्वान गरेको थियो भने क्वेटा, लोरालाई र सिब्बी बार एशोसिएसनहरूले पनि अदालत बहिष्कार गरी विरोध जनाएका छन् ।

यस्तै, मस्तङ बार एशोसिएसनले मंगलबार मार्च १० मा अदालतका कारबाही बहिष्कार गर्दै हस्सानीको मृत्युको छानबिनका लागि स्वतन्त्र न्यायिक आयोग गठन गर्न माग गरेको छ । युवा वकिलहरूको सञ्जालले पनि यस घटनाको कडा भर्त्सना गर्दै निष्पक्ष अनुसन्धानको माग गरेको छ ।