काठमाडौं- इन्डोनेसियाले भारतसँग ब्रह्मोस मिसाइल प्रणाली खरिद गर्ने औपचारिक सम्झौता गरेको छ । इन्डोनेसियाली रक्षा मन्त्रालयका प्रवक्ता रिको रिकाडो सिराइटले सोमबार यसको पुष्टि गर्दै यो सम्झौता देशको सैन्य उपकरणको आधुनिकीकरण र विशेष गरी समुद्री क्षेत्रको रक्षा क्षमता सुदृढ गर्ने अभियानको हिस्सा भएको बताएका छन् ।

भारत र रुसको संयुक्त उपक्रममा निर्मित यो सुपरसोनिक क्रुज मिसाइल खरिदका लागि इन्डोनेसियाले करिब २० करोड देखि ३५ करोड डलरसम्मको सम्झौता गरेको अनुमान गरिएको छ । यसअघि सन् २०२२ मा फिलिपिन्सले पनि भारतसँग ब्रह्मोस मिसाइल खरिद गर्ने सम्झौता गरेको थियो ।

यससँगै इन्डोनेसिया यो अत्याधुनिक मिसाइल प्रणाली भित्र्याउने दोस्रो दक्षिणपूर्वी एसियाली राष्ट्र बनेको छ । सन् २०२५ को मे महिनामा पाकिस्तानविरुद्धको ‘अपरेशन सिन्दूर’ मा ब्रह्मोस मिसाइलले देखाएको उच्च प्रदर्शन र सटिक प्रहार क्षमतापछि धेरै देशहरूले यसप्रति चासो देखाएका थिए ।

इन्डोनेसियाले आफ्नो विशाल समुद्री तट र टापुहरूको सुरक्षाका लागि यो मिसाइल प्रणाली निकै प्रभावकारी हुने विश्वास लिएको छ। इन्डोनेसियाली सरकारले हाल सैन्य बजेटमा उल्लेख्य वृद्धि गर्दै पुराना युद्धक विमान र हतियारहरूलाई नयाँ प्रविधिले प्रतिस्थापन गरिरहेको छ।

ब्रह्मोस मिसाइल जमिन, जहाज, पनडुब्बी र विमान गरी चारै ठाउँबाट प्रहार गर्न सकिने विश्वकै तीव्र गतिको मिसाइल मध्ये एक मानिन्छ। यो सम्झौताले दक्षिण एसिया र दक्षिणपूर्वी एसियामा भारतको रणनीतिक र रक्षा निर्यातको भूमिकालाई अझ बलियो बनाएको छ।