काठमाडौं– नेपाली राष्ट्रिय फुटबल टिमका नवनियुक्त मुख्य प्रशिक्षक गुग्लिएल्मो एरेनाले नेपाली टिमलाई नयाँ उचाइमा पुराउने लक्ष्यका साथ अघि बढ्ने बताएका छन्  ।  

शुक्रबार एन्फा कम्प्लेक्स सातदोबाटोमा सञ्चारकर्मीसँगको अन्तर्क्रियामा नवनियुक्त प्रशिक्षक एरिनाले नेपाली टीममा देखिएको कमीकमजोरीलाई सुधार गर्दै नयाँ उचाइमा पुराउने लक्ष्यका साथ अघि बढ्ने बताएका हुन्।

उनले आफू मुख्य प्रशिक्षकको जिम्मेवारीमा रहँदा राष्ट्रिय टिमलाई साफ च्याम्पियनसिप जिताउने मुख्य लक्ष्य हुने उल्लेख गरे । 

नेपाली खेलाडीहरूमा निकै राम्रो क्षमता आफूले देखेको भन्दै प्रशिक्षक एरिनाले खेलाडीहरूलाई पूर्ण रुपमा तयार पार्ने बताए । हङकङसँगको अन्तर्राष्ट्रिय मैत्रीपूर्ण खेलदेखि त्यसपछिका खेलहरूमा राम्रो नजिता आउने उनको विश्वास छ । 

अखिल नेपाल फुटबल संघ (एन्फा)का एरेनालाई एकबर्षका लागि मुख्य प्रशिक्षक नियुक्त गरेको हो । उनले विभिन्न देशका क्लबहरूमा प्रशिक्षकको भूमिका निर्वाह गरिसकेका छन् ।