काठमाडौं- इराकको स्वशासित क्षेत्र इराकी कुर्दिस्तानमा रहेको एउटा इटालियन सैन्य आधार शिविरमा आक्रमण भएको छ । गएराति इराकी कुर्दिस्तानस्थित इटालियन सैन्य आधार शिविरमा हवाई आक्रमण भएको इटालीका रक्षा अधिकारीहरूले बताएका छन् ।

रोयटर्सका अनुसार उक्त आक्रमणमा कुनै मानवीय क्षति भने भएको छैन । मन्त्रालयका स्रोतहरूले जानकारी दिए अनुसार इराकी कुर्दिस्तानको राजधानी एर्बिलस्थित उक्त सैन्य शिविरमा एउटा ड्रोन खस्दा सैन्य सवारी साधन पूर्ण रूपमा ध्वस्त भएको छ ।

इटालीले सोही स्थानमा रहेर कुर्दिश सुरक्षा बलहरूलाई तालिम दिँदै आएको छ । अधिकारीहरूका अनुसार उक्त ड्रोनले आधार शिविरलाई नै लक्षित गरेको नभई उचाइ गुमाएपछि दुर्घटनावश त्यहाँ खसेको हुनसक्ने अनुमान गरिएको छ ।