तेहरान- इरानी संसदका सभामुख मोहम्मद बगेर कलिबाफले फारसको खाडीमा आक्रमणकारीको रगत बग्ने चेतावनी दिएका छन् । उनले बिहीबार सामाजिक सञ्जालमार्फत् कडा चेतावनी दिँदै इरानको अधिनमा रहेका टापुमा कुनै पनि आक्रमण भए फारसको खाडीमा आक्रमणकारीको रगत बग्ने चेतावनी दिएका हुन् ।

पश्चिम एशियामा जारी युद्धका क्रममा आएको कलिबाफको यो भनाइले तनाव थप बढ्ने समाचार संस्था एपीले जनाएको छ । यद्यपि उनले के कारणले यस्तो टिप्पणी गरे भन्ने कुरा स्पष्ट भइसकेको छैन ।

इरानले सन् १९७१ मा संयुक्त अरब इमिरेट्सको स्थापना हुनुअघि नै त्यहाँका तीन वटा टापुहरू आफ्नो नियन्त्रणमा लिएको थियो । अमेरिका र इरजरायलले इरानको मुख्य तेल टर्मिनल रहेको खार्ग टापुलाई निशाना बनाउन सक्ने अनुमानहरू पनि भइरहेका छन् । यसै क्रममा सभामुख कलिबाफको यो भनाइलाई चासोका साथ हेरिएको छ ।

सामाजिक सञ्जाल ‘एक्स’ मा ‘मातृभूमि वा मृत्यु !’ लेख्दै इरानी भूमिमाथि हुने कुनै पनि आक्रमणले आफ्ना सबै संयमहरू तोड्ने चेतावनी दिएका छन् । उनले अमेरिकी सैनिकहरूको रगत बगेमा त्यसको व्यक्तिगत जिम्मेवारी डोनाल्ड ट्रम्पले लिनुपर्ने समेत उल्लेख गरेका छन् ।