वासिङ्गटन- अमेरिकी सरकारकै एक रिपोर्टले इरानको वर्तमान सरकार तत्कालै ढल्न नसक्ने निष्कर्ष निकालेको छ।

अमेरिकी सरकारको एक गोप्य प्रतिवेदनमा हालैका घटनाका बाबजुद इरानको सरकार तत्काल ढल्ने सम्भावना नरहेको उल्लेख गरिएको छ। यो जानकारी रोयटर्सको रिपोर्टमार्फत सार्वजनिक भएको हो।

रिपोर्टका अनुसार विभिन्न गुप्तचर एजेन्सीका मूल्याङ्कनले इरानी सरकार अझै बलियो रहेको र देशमा उसको नियन्त्रण कायम रहेको देखाएको छ।

त्यस प्रतिवेदनमा २८ फेब्रुअरीमा अमेरिका र इजरायलले गरेको हमलामा इरानका सर्वोच्च नेता अलि खामेनेईको मृत्यु भएको दाबी गरिए पनि त्यसपछि पनि सरकार कायमै रहेको उल्लेख गरिएको छ।

यस्तै, एक इजरायली अधिकारीले पनि यो युद्धकै कारण इरानको सरकार अवश्य ढल्छ भन्ने कुनै ठोस ग्यारेन्टी नभएको स्वीकार गरेका छन्।