काठमाडौं– हृदयघातका कारण निधन भएका भाषा आयोगका सदस्य, साहित्यकार एवं पत्रकार सुरेश मानन्धरलाई राष्ट्रिय झण्डा ओढाई सम्मानका श्रद्धाञ्जली अर्पण गरिएको छ । 

बुधबार संस्कृति, पर्यटन तथा नागरिक उड्डयनमन्त्री अनिलकुमार सिन्हाले दिवंगत मानन्धरको पार्थिव शरिरमा राष्ट्रिय झण्डा ओढाई सम्मानका श्रद्धाञ्जली अर्पण गरेका हुन् । 

मंगलबार निधन भएका मानन्धरको पार्थिव शरीरलाई श्रद्धाञ्जलीका लागि बुधबार नेपाल भाषा मंका खलको कार्यालय परिसरमा राखिएको थियो ।

मन्त्री सिन्हा, काठमाडौं महानगरकी कार्यवाहक प्रमुख सुनिता डंगोल लगायतले मानन्धरप्रति अन्तिम श्रद्धाञ्जली अर्पण गरेका थिए । 

श्रद्धाञ्जली अर्पणपछि मन्त्री सिन्हाले नेपाली भाषा, साहित्य तथा पत्रकारिता क्षेत्रमा मानन्धरले पुर्‍याएको योगदानको स्मरण गरे । उनले मानन्धरलाई राज्यका तर्फबाट उचित सम्मान गर्न आफूले आवश्यक पहल गर्ने बताए ।

नेपालभाषा टाइम्सका पूर्व सम्पादकसमेत रहेका मानन्धरले प्रज्ञा प्रतिष्ठानबाट प्रकाशन हुने विभिन्न पत्रपत्रिकाको सम्पादनमा समेत महत्त्वपूर्ण योगदान पुर्‍याएका थिए । विसं २०२३ कात्तिकमा जन्मिएका मानन्धरका श्रीमती र दुई छोरा छन् ।