काठमाडौं – नायिका रेखा थापाको निर्देशनमा फिल्म ‘माया भनेको यस्तै होला’को सुटिङ सुरु भएको छ ।

महाशिवरात्रिको अवसर पारेर फागुन ३ गते निर्माण घोषण गरिएको यस फिल्मको सुटिङ सोमबारबाट सुरु भएको भएको हो । काठमाडौंका शिवपुरबाट रेखाले सुटिङ सुरु गरेकी हुन् ।

रेखा आठ वर्षपछि यही फिल्मबाट निर्देशनमा फर्किएकी हुन् । उनले यसअघि ‘हिम्मतवाली’ र ‘मालिका’ निर्देशन गरेकी थिइन् । रेखाले पहिलो पटक बाहिरी ब्यानरको फिल्म निर्देशन गर्न लागेकी हुन् ।

रेखाका अनुसार काठमाडौं वरवर नै यसको छायाङ्कन हुनेछ । एक महिने तालिका लिएर उनी छायाङ्कनमा निस्किएकी हुन् ।

‘माया भनेको यस्तै होला’मा दुई पूर्वमिस नेपाल सृष्टि श्रेष्ठ र नम्रता श्रेष्ठ नायिकाको भूमिकामा छन् । त्यस्तै, पूर्वमिस नेपाल इन्टरनेन्सल नीति शाह पनि यसको शीर्ष नायिका हुन् । नायकको भूमिकामा दिल श्रेष्ठ रहेका छन् ।

‘दिया एण्ड अमु फिल्मस्’ को ब्यानरमा निर्माण हुने यस फिल्मको लेखक ध्रुव लम्साल हुन् । तीज लक्षित गरी फिल्म प्रदर्शनमा ल्याउने रेखाको तयारी रहेको छ ।