कोलम्बो- श्रीलङ्काका राष्ट्रपति अनुरा कुमारा दिसानायकेले विश्व समुदायसँग शान्तिको अपील गरेका छन् । उनले युद्धमा नागरिकको ज्यान जोगिनुपर्ने उल्लेख गर्दै शान्तिको अपील गरेका हुन् ।

अमेरिकी टारपिडो प्रहारबाट क्षतिग्रस्त भएको इरानी जहाजबाट उद्धार गरिएका २०० जना इरानी नाविकहरूलाई आफ्नो देशमा शरण दिएपछि राष्ट्रपति दिसानायकेले यस्तो प्रतिक्रिया दिएका हुन् ।

कुनै पनि युद्धमा सर्वसाधारणको मृत्यु हुन नहुने धारणा राख्दै उनले सबै पक्षलाई शान्तिप्रति प्रतिबद्ध रहन आग्रह गरेका छन् । श्रीलङ्काले एक राष्ट्रको रूपमा शत्रुतापूर्ण गतिविधिहरू अन्त्य गर्न र मानवीयताको रक्षाका लागि चालिने हरेक कदमलाई पूर्ण सहयोग गर्ने प्रतिबद्धता समेत व्यक्त गरेको छ ।

राष्ट्रपतिको यो भनाइले वर्तमान तनावपूर्ण परिस्थितिमा जीवन बचाउनु र मानवीय संवेदनालाई प्राथमिकता दिनु नै आफ्नो मुख्य उद्देश्य रहेको प्रस्ट पारेको छ।