काठमाडौं- मध्यपूर्वमा जारी द्वन्द्वका कारण फ्रान्सका ६० जहाज अलपत्र परेका छन् । फ्रान्सका यातायातमन्त्री फिलिप ताबारोतले फारसको खाडीमा ५२ वटा र लाल सागरमा थप आठ वटा फ्रान्सेली जहाजहरू रोकिएको जानकारी दिएका छन् ।

फ्रान्सेली सञ्चारमाध्यम सी-न्युजसँग कुरा गर्दै मन्त्री ताबारोतले ती जहाजहरूमा फ्रान्सेली नाविकहरू समेत रहेको र सरकार उनीहरूसँग निरन्तर सम्पर्कमा रहेको जानकारी दिए ।

क्षेत्रमा बढ्दो तनावका कारण व्यावसायिक जहाजहरूको आवागमन प्रभावित भएपछि पेरिसले अब ढुवानी मार्गलाई सुरक्षित बनाउन विभिन्न देशहरूको एउटा शक्तिशाली गठबन्धन बनाउने प्रयास सुरु गरेको छ।

विशेषगरी फारसको खाडीमा ठूलो संख्यामा जहाजहरू रोकिएपछि फ्रान्सले समुद्री ट्राफिकलाई सुचारु गर्न र आफ्ना नागरिकहरूको सुरक्षा सुनिश्चित गर्न कूटनीतिक र सुरक्षा रणनीति तीव्र पारेको छ।