काठमाडौं- काठमाडौँ निर्वाचन क्षेत्र नम्बर ३ को पछिल्लो मतपरिणाम अनुसार चुनावी प्रतिस्पर्धा थप रोचक बनेको छ। प्राप्त ताजा विवरण अनुसार उज्यालो नेपाल पार्टीका उम्मेदवार कुलमान घिसिङले आफ्नो अग्रतालाई अझ मजबुत बनाउँदै १८४६ मत प्राप्त गरेका छन्। सुरुवाती चरणदेखि नै अग्रस्थानमा रहेका घिसिङले अन्य प्रतिस्पर्धीसँगको मतान्तरलाई बिस्तारै बढाउँदै लगेका हुन्।

उनलाई राष्ट्रिय स्वतन्त्र पार्टीका उम्मेदवार राजु नाथ पाण्डेले १५६० मतका साथ पछ्याइरहेका छन्। घिसिङ र पाण्डेबीचको यो कडा प्रतिस्पर्धाले काठमाडौँ-३ को चुनावी नतिजालाई निकै कौतूहलपूर्ण बनाएको छ। त्यस्तै, नेपाली कांग्रेसका उम्मेदवार रमेश अर्यालले हालसम्म ५८३ मत प्राप्त गरेका छन् भने नेकपा (एमाले) का उम्मेदवार रामेश्वर फुयाल ४५६ मतका साथ प्रतिस्पर्धामा देखिएका छन्।

अहिले मुख्य निर्वाचन अधिकृतको कार्यालयमा मतगणना कार्य तीव्र गतिमा अगाडि बढिरहेको छ। विभिन्न मतदान केन्द्रबाट संकलित मतपेटिकाहरू पालैपालो गणना भइरहेकाले आगामी केही समयभित्रै थप परिणामहरू सार्वजनिक हुने अपेक्षा गरिएको छ। गणना स्थलमा सुरक्षा व्यवस्था निकै कडा पारिएको छ र राजनीतिक दलका प्रतिनिधिहरूले सूक्ष्म रूपमा गणना प्रक्रियाको निगरानी गरिरहेका छन्।